آصف نیوز پاکستان

وزیر اعظم کھائی اور کنویں کے درمیان پھنس چکے

گیارہ مئی کو ایک طرف اسلام آباد کے ڈی چوک میں عمران خان اپنے پرجوش کارکنوں کے سامنے چار حلقوں میں انگوٹھوں کے نشانات کی تصدیق، انتخابی اصلاحات اور دھاندلی کی تحقیقات کا مطالبہ کر رہے تھے تو دوسری طرف کینیڈا سے ڈاکٹر طاہر القادری پاکستان کے 26 شہروں میں ہونیوالے اجتماعات سے اپنے ویڈیو لنک خطاب میں موجودہ پارلیمانی سسٹم کو آئینی خلاف ورزیوں کی بنیاد پر مسترد کر رہے تھے۔ اس صورتحال میں وزیر اعظم کو جلد ازجلد کوئی سیاسی حل نکالنے کی ضرورت ہے۔ عمران خان اور طاہرالقادری دونوں وہ سیاسی خلاء پر کرنے کی کوشش کر رہے ہیں۔
جو وزیر اعظم کے فوج کے ساتھ جاری برتائو اور اختلافات کے نتیجے میں پیدا ہوا ہے خصوصاً ان الزامات کے بعد کہ وزیراعظم نے جی ایچ کیو کیخلاف نجی میڈیا گروپ کے ساتھ کھڑے ہیں، اس صورتحال نے مسلم لیگ (ن) کو متنوع اور مخاصمانہ میڈیا مارکیٹ میں دوستوں سے محروم کر دیا ہے۔ اگرچہ عمران خان کے تمام مطالبات جمہوری ہیں تاہم مسلم لیگ (ن) کے قائدین پریشان کن نتائج کے خدشے کے پیش نظر چار حلقوں میں انگوٹھوں کے نشانات کی تصدیق کرانے سے خوفزدہ ہیں کیونکہ  اس سے مسلم لیگ ن کی پورے الیکشن میں کامیابی مشکوک ہو سکتی ہے۔ قومی میڈیا نے اگرچہ طاہرالقادری کے مطالبات کو غیر حقیقت پسندانہ خیال کرتے ہوئے عمران خان کے مطالبات پر توجہ مرکوز رکھی تاہم سوشل میڈیا پر نوجوانوں کی اکثریت طاہرالقادری کے نکات کو عمران خان کے مقابلے میں زیادہ منطقی اور واضح تصور کر رہی ہے، اور اسکی ایک سیاسی اہمیت ہے وہ اس طرح کہ اگر عمران  حکومت کے ساتھ نرم رویہ اختیار کرتے ہیں یا اپنے مطالبات پورے کرانے میں ناکام رہتے ہیں تو اپوزیشن حلقوں کیلئے طاہرالقادری کیلئے دلچسپی بڑھ جائیگی۔
ایسے میں جب حکومت کے فوج کے ساتھ تعلقات خراب چل رہے ہیں وزیر اعظم کیلئے ناگزیر ہے کہ وہ کمپرومائز کریں ۔  دیکھنا یہ ہے کہ وہ کیا عمران خان کے سیاسی مطالبات تسلیم کرتے ہیں یا وہ ملٹری اسٹیبلشمنٹ کے ساتھ کے ساتھ اختلافات کو طے کرتے ہیں۔ اس حوالے سے وزیراعظم کو اپنی سیاست میں لچک کا مظاہرہ کرنا ہوگا، انہیں ن لیگ کی میڈیا مینجمنٹ پر بھی توجہ دینے کی ضرورت ہے اس ضمن میں انہیں میڈیا کے مختلف حلقوں میں اپنے لئے حمایت پیدا کرنا ہوگی نہ کہ وہ صرف ایک میڈیا گروپ پر انحصار کرتے رہیں جس نے انہیں ایک کونے میں دھکیل دیا ہے۔ (ڈاکٹر معید پیرزادہ ایکسپریس کے گروپ تجزیہ کارہ ہیں)۔